我的買樓價值觀

孩子對我說：「我真係唔想供樓，供完層樓已經入棺財，都唔知為乜？」
如果十幾年前聽到佢地咁購，一定會好激氣，起碼要想辦法，去改變佢地呢個唸法，但今時今日既我，竟然覺得佢哋係-智者。

曾經聽過有D已經出來做野好幾年既年輕人，即使係專業人士，並且已經儲左幾十萬首期，仍然感到供樓有壓力。最重要係，每日返工返到晚上十一點幾，有時甚至會在公司過夜，都唔知咁辛苦供層樓做乜。當然，將儲起的錢用來買樓，的確係一樣唔錯既投資選擇。但如果要問銀行借錢黎買樓，你會發現二十年來既供款，足夠你可以買多好幾層樓。而且我覺得，綜合左我咁多年的經驗，租樓可以揀一間你喜歡而且新淨嘅裝修，但如果層樓係你買咗落嚟嘅話，咁你就要有錢，先至可以裝修。不過 而家供樓都咁辛苦，仲邊有閒錢儲起嚟裝修呀？ 而且萬一間屋有乜嘢問題， 例如樓上滲水，爆屎渠， 甚至乎隔離屋住咗個麻煩住客， 咁你就唔可以一走了之。

亦都有啲人話，買層樓係要嚟防老。 你老咗嘅時候，冇人租樓畀你都唔使怕。因為好多人都唔喜歡租樓俾老人家，佢哋怕會C咗喺自己間屋裏面。
對於呢一個問題嚟講，你需要嘅係，擁有一筆可觀嘅退休金。 咁即使冇人租樓畀你住，你都可以住酒店， 甚至乎可以買 一間自己理想嘅屋返嚟住下添。 其實，你攞20年嚟供樓嘅錢儲起佢，即使有通脹 （最好就唔好擺喺銀行，攞嚟投資啦）儲到嘅錢，到你退休嘅時候，都可以買到間細細地嘅屋仔住下。 當然有啲人會話，鬼唔知有錢係萬能嘅咩！ 但要有恆心去儲起呢廿年嘅供樓錢，有幾多人能夠做到？其實，你一旦開始咗供樓，都唔能夠保證20年後層樓仲喺度，冇畀你賣咗架！
所以話，人生目標應該係，退休嘅時候，有足夠嘅錢畀你花。唔係擔心你老咗之後，冇人租樓畀你住。

不過講到呢度又講返轉頭喇，今日唔知聽日事 你計畫得咁好，分分鐘聽日行出街俾嘢摘落嚟或者交通意外瓜咗，咁你計劃咁多都係嘥氣嘅。所以點解我會話啲仔女係-智者，因為佢哋懂得活在當下，呢樣野先至係最重要嘅。當然，如果係唔影響生活質素及無壓力之下，可以計劃埋日後既*退休生活，咁就會更好啦！

*註：如果真係冇辦法儲到錢，又或者臨老先至畀人呃曬啲棺材本，咁樣你就要有一個孝順嘅仔女供養你，或者有一個尚存嘅父母，畀你做啃老族喇！否則，可能就要靠政府養你喇！